كرهت الكورة وكرهت من بكى جميل الصــورة...!!

أثناء نقل مباريات كأس العالم لسنة 1990 في ايطاليا وعند خسارة البرازيل أظهرت إحدى الكاميرات إحدى المشجعات التى كانت تبكي لخسارة فريقها.
وقد اثار المشهد الشاعر حسن المقرحي وألف قصيدة في هذه اللقطة...


تقول القصيدة:



كرهت الكورة وكرهت من بكى جميل الصورة في كاس العالم




كــرهــتــا كـــاســـا...وكرهت من كان السبب في ياسـا
وكرهت من خلا الدموع حواسـا...على خدها سالت وهي مقهـوره
ونا سال دمعي في دواعي واسـا...رقيق عزم فيها بكوتـي معـذوره
اللي خدها يضوي متيـل الماسـه...في الشوط الاول فرحتا مغمـوره
رقيقة مشاعر ناعمـه حساسـه...مرهون فرحك بشبـاك اسـروره
عزيزى الهدف يجيها بكل سياسه...ونقار حارسهـا قديـم اشهـوره
وانتـي جميلـه رفقتـك وناسـه...مانكش كيف امنـاي هالمغـروره
نصيحه ان تنسي تعكسي عالطاسه...في بـار ليلـي مايطفـي نـوره




فردت عليه البنت وقالت:






ماهو اخصاره ... دمعي عللي يلعبو بجداره
لكن خسـارة الكـاس هـي لخسـاره...نبكـي علـيـه ودمعـتـي مجـبـوره
وماتلومني فـي بكـاي ماهـي صغـارة...علي ناس نـا بيهـم صحيـح فخـوره
العـلـم البرازيـلـي داع اخـبــاره...اسيـاد الرياضـه فـن لعـب الكـوره
وكيف دمعتك سيـل كحيـل انظـاره... نـا دمعتـي سالـت احكـام ضـروره



رد عليها الشاعر حسن وقال:


وخدودها وين القمر ينظرهـا...اصيرلا كسوف غار يطفا نوره
سبحان مولانا اللي صورهـا...تحلف منلي في جناين حـوره
دعانا عللي صفوتـه كدرهـا...وخلى الخاطر دابلات زهـوره
رتكبو جريمه صيفوا منظرهـا...اللي قبل كانت عالجمال غيوره
ليش الجميله تكسرو خاطرهـا...ولا تحسبوا لحساسها وسروره





وتجي البنت قائلة:



يموت حنيني ... وتجف دمعاتي وتعما عيني
ودعــاي عالفـريـق الارجنتيـنـي...اللي فرحتـي منهـم بقـت ماسـوره
وماعـاد حاجـه فـي الحيـاة تلهينـي...بعـد الجرايـد شـاهـده بالـصـوره
وحيـده بقيـت ولا مـن يواسيـنـي...ليـن ننتهـي تحـت الثـرى مقبـوره



ويختم الشاعر القصيدة بقوله:



كرهـتـا الـلـي بكـاهـا...كيف ماكرهت الخاينه فغلاهـا
اللي قبل عاشقهن حروف اسماها...واليوم منها دمعتـي مهـدوره
فيما مضى واجد بنيـت معهـا...غلانا بقي للناس كي لسطـوره
وانتي عالهزيمه دمعتـك ريناهـا...سالت على ميل الزمان وجوره
والياس طاغي حالتـك رداهـا...ولا ينفعك دكتور لا دكتـوره
ويلي صعيبه صورتك ننساهـا...وطيفك مشقي خاطري بسموره