*** النفس ***

من طرف **dr-sami** الجمعة أغسطس 01, 2008 9:37 am

ابتدائها الشاعر عبد الكريم بوجديّدة وقال:

اصحي م الخطا يانفس راك اتلقي
بكرة وراك احساب روحك وقي
وراك امحاسب
اصحي يزنقك في وقت موش مناسب
يظهر اللي خسران واللي كاسب
لايزيد لاينقص احسابك دقي
واخلي بالك
واصحي الدنيا تشغلك عن حالك
رزقك وعمرك فيد واحد مالك
دارلك اعيون وعقل بيش اتحقي
سيبي الخطر خلك معا المسالك
وانتي امغير اتخشني وترقي
اصحي من جره
اديري عمل يبقى وراك مضره
لو تعرفي يوم الحساب ومره
ان تبقي علي روحك امغير اتنقي
كنيب يكفينا المولى شره
ان كان ع العمل يانفس حيه ابهقي
اصحي م الزوفه
اديري عمل يبقى وراه حسوفه
واجب عليّ ننهاك عثر الحوفه
وسكة الجنه باينه معروفه
ربك زرعلك خير وانتي سقي

فرد الشاعر المرحوم غالب بو امطير
اصحي تنحرفي
شور الخطا والمعصيه تنجرفي
راك تحسبي الحساب قعدة عرفي
ينفع انكارك كي الحجر اطقي
والله انوض م الميعاد ننفض طرفي
وتبقي اتمطي ف العلل واتمقي
يانفس يا اماره
ياناسيه يوم الحساب ونارا
يوم ينكشف للناس كل امضارا
يومن احساب عسير حقك حقي
وتشهد اعضا لنسان علي دارا
وماعدشي ينفع كلام البقي
يوم الطامه
والعالم مصابي كلها منضامه
انفات من اللي ضله الله بغمامه
داير عمل صالح عليه اموفي
خذ جايزه كبرى ارضا وكرامه
اللي كان ف الدنيا صلاح امتقي
اخضعي للهِ
ولاتبعي النضل واللي ساهي
امتثلي لمرا واستجنبي النواهي
طريقك امعا وسط المخاطر شقي
ناري عللي خذ حياته لاهي
ايجيه يوم يبقى م العذاب ايزقي
ايحاسب علي لسراف عند الشاهي
يابال في نوع الخمور ينقي
ونطلب اللي نوّر النور الزاهي
يغفر الماضي ويستر المتبقي

من ديوان الشعر